Chitral Times

Feb 9, 2025

ﺗﻔﺼﻴﻼﺕ

معلومات کی عدم فراہمی پر سرکاری اداروں کے خلاف سخت اقدامات اٹھانے کا فیصلہ 

Posted on
شیئر کریں:

معلومات کی عدم فراہمی پر سرکاری اداروں کے خلاف سخت اقدامات اٹھانے کا فیصلہ

 

پشاور(چترال ٹائمزرپورٹ)چیف انفارمیشن کمشنر مسز فرح حامد خان، انفارمیشن کمشنرز ارشد احمد اور محمد ارشاد پر مشتمل خیبر پختونخوا انفارمشین کمیشن نے شہریوں کی شکایات پر مختلف کیسز کی سماعت کی۔ سماعت میں، شہریوں کی درخواستوں پر بروقت معلومات نہ فراہم کرنے پر ہائیر ایجوکیشن ریگولیٹری اتھارٹی، محکمہ پولیس اور واٹر اینڈ سینیٹیشن سروسز پشاور کو شوکاز نوٹس اور وارننگ لیٹر جاری کرنے کا فیصلہ کیا۔ایک شکایت جس میں پشاور کے شہری محمد ایاز نے واٹر اینڈ سینیٹیشن سروسز پشاور سے ٹیوب ویل آپریٹرز کی بھرتی کے بارے میں معلومات مانگی تھیں کی سماعت پر کمیشن نے ڈبلیو ایس ایس پی کے پبلک انفارمیشن آفیسر کو ہدایات جاری کیں کہ خیبر پختونخوا معلومات تک رسائی کے قانون کے سیکشن 5 کے تحت تمام 12 نوعیت کی معلومات ویب سائٹ پر اپلوڈ کردی جائیں جبکہ ایچ آر منیجر کو اگلی پیشی میں تمام تر ریکارڈ کیساتھ خود حاضر ہونے کے احکامات جاری کئے۔

 

دوسرے کیس جس میں تخت بھائی کے فہیم اعظم نامی شہری نے سوائل اینڈ واٹر کنزرویشن ڈیپارٹمنٹ مردان سے، جنوری 2017 سے آج تک کے تمام ترقیاتی منصوبوں کی تفصیلات مانگی تھیں پر کاروائی کرتے ہوئے کمیشن نے سوائل اینڈ واٹر کنزرویشن ڈیپارٹمنٹ کے ڈائریکٹر کو ایک ہفتے کے اندر شہری کو اس کی مطلوبہ معلومات فراہم کرنے اور اس کی رپورٹ کمیشن کو بھیجنے کی ہدایات جاری کیں۔

 

اس کے علاوہ کمیشن نے سماعت میں پولیس کے اے آئی جی لیگل کی غیرحاضری اور اپنی جگہ سب انسپکٹر کو بھیجنے کا سخت نوٹس لیتے ہوئے اے آئی جی کو شہری کی مطلوبہ معلومات کے ساتھ کمیشن میں خود پیش ہونے کی ہدایات جاری کیں۔ ایک اور کیس میں کلچر اینڈ ٹورزم اتھارٹی کے پبلک انفارمیشن آفیسر مہد حسنین نے کمیشن کو بتایا کہ کلچر اینڈ ٹورزم اتھارٹی نے زیادہ تر معلومات ویب سائٹ پر اپلوڈ کی ہیں جبکہ شہری کو مطلوبہ باقی معلومات بھی ایک ہفتے کے اندر ویب سائٹ پر اپلوڈ کر دی جائیں گی جبکہ نورالابصار نامی شہری کی شکایت پر فیصلہ کرتے ہوئے کمیشن نے لوکل کونسل بورڈ کے سیکرٹری کو لوکل کونسل بورڈ کے اکاؤنٹس سیکشن کے خلاف کاروائی کیلئے خط لکھنے کا فیصلہ کیا۔

 

 


شیئر کریں:
Posted in تازہ ترین, جنرل خبریںTagged
98153