مخصوص نشستوں کے فیصلے پر عملدرآمد نہ کرانے پر توہین عدالت کی درخواست دائر
اسلام آباد(چترال ٹائمزرپورٹ) مخصوص نشستوں کے کیس میں سپریم کورٹ کے فیصلے پر عملدرآمد نہ کرنے پر توہین عدالت کی درخواست دائر کر دی گئی۔سپریم کورٹ کے مخصوص نشستوں کے متعلق فیصلے پر عملدرآمد نہ کرنے پر پی ٹی آئی وکیل سلمان اکرم راجہ نے الیکشن کمیشن کے خلاف توہین عدالت کی درخواست دائر کی، درخواست میں الیکشن کمیشن کے ارکان کو فریق بنایا گیا ہے۔دائر درخواست میں سلمان اکرم راجہ نے استدعا کی کہ الیکشن کمیشن کو مخصوص نشستوں سے متعلق عدالتی فیصلے پر فوری عملدرآمد کا حکم دیا جائے اور کمیشن ارکان کیخلاف توہین عدالت کی کارروائی بھی کی جائے۔
5 سال سے زیادہ عرصے سے لاپتا افراد کے خاندانوں کو حکومت معاوضہ دے گی: عدالت
پشاور(سی ایم لنکس)پشاور ہائی کورٹ نے لاپتا افراد سے متعلق کیس کی سماعت کے دوران ریمارکس دیئے ہیں کہ 5 سال سے زیادہ عرصے سے لاپتا افراد کے خاندانوں کو حکومت معاوضہ دے گی۔چیف جسٹس پشاور ہائی کورٹ جسٹس اشتیاق ابراہیم نے 13 لاپتا افراد کے کیسز کی سماعت کی، دوران سماعت عدالت نے وفاقی اور صوبائی حکومتوں سے رپورٹ طلب کر لی۔چف جسٹس پشاور ہائی کورٹ نے دوران سماعت ریمارکس دیئے کہ 5 سال سے زیادہ عرصے سے مسنگ پرسنز کے خاندانوں کو حکومت معاوضہ دے گی۔عدالت نے استفسار کیا کہ یو این کنونشن میں بھی یہ بات تھی، اس کا کیا ہوا؟ کیا حکومت نے متاثرہ خاندانوں کو معاوضہ دیا؟ عدالتی استفسار پر ڈپٹی اٹارنی جنرل نے جواب دیا کہ آئندہ سماعت پر اس سے متعلق رپورٹ پیش کرتا ہوں۔بعدازاں پشاور ہائی کورٹ نے وفاقی و صوبائی حکومتوں سے رپورٹ طلب کرتے ہوئے لاپتا افراد سے متعلق کیسز کی سماعت ملتوی کردی۔