محکمہ سی اینڈ ڈبلیو نے ترقیاتی منصوبوں پر عملدرآمد و دیگر متعلقہ امور کے لیے آن لائن سسٹم ‘پبلک ورکس منیجمنٹ انفارمیشن سسٹم ‘ تیار کرلیا، تمام معاملات آن لائن ڈیل کیے جائیں گے
محکمہ سی اینڈ ڈبلیو نے ترقیاتی منصوبوں پر عملدرآمد و دیگر متعلقہ امور کے لیے آن لائن سسٹم ‘پبلک ورکس منیجمنٹ انفارمیشن سسٹم ‘ تیار کرلیا، تمام معاملات آن لائن ڈیل کیے جائیں گے
پشاور( نمائندہ چترال تائمز ) وزیر اعلیٰ خیبر پختونخوا علی امین خان گنڈاپور کی قیادت میں خیبر پختونخوا حکومت نے ڈیجیٹائزیشن کی جانب اور ایک اہم سنگ میل عبور کرلیا۔ محکمہ سی اینڈ ڈبلیو نے ترقیاتی منصوبوں پر عملدرآمد ، منصوبوں کی فنانشل منیجمنٹ اور دیگر متعلقہ امور کے لیے آن لائن سسٹم ‘پبلک ورکس منیجمنٹ انفارمیشن سسٹم ‘ تیار کرلیا ہے۔ پیر کے روز وزیر اعلیٰ خیبر پختونخوا علی امین خان گنڈاپور کی زیر صدارت محکمہ سی اینڈ ڈبلیو کےاجلاس میں نئے آن لائن سسٹم بارے تفصیلی بریفنگ دی گئی ۔ چیف سیکرٹری خیبر پختونخوا شہاب علی شاہ ، متعلقہ محکموں کے انتظامی سیکرٹریز و دیگر متعلقہ حکام بھی اجلاس میں شریک ہوئے ۔
اجلاس کو بریفنگ دیتے ہوئے بتایا گیا کہ آن لائن سسٹم ‘ پبلک ورکس منیجمنٹ انفارمیشن سسٹم ‘ کے ذریعے ترقیاتی منصوبوں سے جڑے تمام معاملات آن لائن ڈیل کیے جائیں گے اور نئے سسٹم کے تحت سی ایم ہاؤس ، تمام صوبائی محکموں اور اے جی آفس میں ڈیش بورڈ قائم ہوگا جس کے ذریعے ترقیاتی منصوبوں سے متعلق تمام تر سرگرمیاں آن لائن مانیٹر کی جائیں گی ۔ اس کے علاؤہ نئے آن لائن سسٹم سے ترقیاتی منصوبوں کے پی سی ونز پر من و عن عملدرآمد ، ترقیاتی منصوبوں کے لیے جاری کردہ فنڈز کا بروقت استعمال اور شفافیت یقینی ہوگی۔ اسی طرح انسانی مداخلت کم سے کم، فیلڈ انجینیئرز کی پرفارمینس ایوالوایشن اور غلطیوں کی گنجائش بھی کم ہو جائے گ۔
مزید برآں ، نئے سسٹم سے ترقیاتی کاموں کا معیار ، محفوظ ریکارڈ اور معلومات کی بروقت دستیابی بھی یقینی ہوگی۔ وزیر اعلیٰ نے اجلاس سے خطاب کرتے ہوئے کہا کہ آن لائن پبلک ورکس منیجمنٹ انفارمیشن سسٹم کا قیام ایک احسن اقدام ہے۔ صوبائی حکومت کرپشن کے خاتمے اور شفافیت کو یقینی بنانے کے لیے سرکاری محکموں میں ڈیجیٹائزیشن پر زیادہ سے زیادہ توجہ دے رہی ہے۔
محکمہ سی اینڈ ڈبلیو میں پبلک ورکس منیجمنٹ انفارمیشن سسٹم کا قیام اس سلسلے کی ایک اہم کڑی ہے۔مستقبل میں تمام ورکس ڈیپارٹمنٹنس میں اس سسٹم کو نافذ کیا جائے گا۔