قراقرم انٹرنیشنل یونیورسٹی میں سنٹرل ایشیاء کارنر کا افتتاح کر لیا گیا
قراقرم انٹرنیشنل یونیورسٹی میں سنٹرل ایشیاء کارنر کا افتتاح کر لیا گیا
کارنر کا افتتاح گورنر گلگت بلتستان سید مہدی شاہ، چیف سکریٹری گلگت بلتستان محی الدین وانی اور وائس چانسلر پروفیسر ڈاکٹر عطاء اللہ شاہ نے کیا۔
سنٹرل ایشیاء کارنر قراقرم انٹرنیشنل یونیورسٹی کے انٹرنیشنل آفس نے کرغزستان کے سفارت خانہ کے تعاون سے قائم کیاہے۔
گلگت (چترال ٹایمزرپورٹ) قراقرم انٹرنیشنل یونیورسٹی انٹرنیشنل آفس کے زیر اہتمام سنٹرل لائبریری میں سنٹرل ایشیاء کارنر کا افتتاح کر دیا گیا۔گورنر گلگت بلتستان سید مہدی شاہ، چیف سکریٹری گلگت بلتستان محی الدین وانی اور وائس چانسلر پروفیسر ڈاکٹر عطاء اللہ شاہ نے کارنر کا افتتاح کیا۔ سنٹرل ایشیاء کارنر قراقرم انٹرنیشنل یونیورسٹی کے انٹرنیشنل آفس نے کرغزستان کے سفارت خانہ کے تعاون سے قائم کیاہے۔ اس موقع پر سنٹرل لائبریری میں ایک پر وقار تقریب کا اہتمام کیا گیا۔ تقریب میں کثیر تعداد میں فیکلٹی، مینجمنٹ سٹاف اور طلباء نے شرکت کی۔ تقریب سے خطاب کر تے ہوئے گورنرگلگت بلتستان سید مہدی شاہ نے کرغزستان حکومت کا شکریہ کیا اور کہا کہ کارنر کے قیام سے گلگت بلتستان کے طلباء کو سنٹرل ایشیاء میں اعلیٰ تعلیم،سکالر شپس اور جدید دور کے تعلیمی تقاضوں کے مطابق تعلیم و تحقیق میں مدد ملے گی۔
اس موقع پر چیف سکریٹری گلگت بلتستان محی الدین وانی نے کہا کہ گلگت بلتستان میں معیاری تعلیم میری اولین ترجیح ہے اور میری کوشش ہے کہ گلگت بلتستان کے بجٹ میں بھی تعلیم کے لئے زیادہ سے زیادہ خیال رکھا جائے۔ چیف سکریٹری نے سنٹرل ایشیاء کارنر کوگلگت بلتستان کے طلباء خصوصاً قراقرم یونیورسٹی کے طلباء کیلئے نیک شگون قرار دیا۔وائس چانسلر پروفیسر ڈاکٹر عطاء اللہ شاہ نے کرغزستان کے سفارت خانہ اور حکومت کا شکریہ ادا کرتے ہوئے کہا کہ یونیورسٹی میں سنٹرل ایشیاء کارنر کے قیام سے گلگت بلتستان کے طلبا ء کو سنٹرل ایشیائی ممالک کے تہذیب و تمدن اور ثقافت پر تحقیق سمیت طلباء کو اپنے اعلیٰ تعلیم کے حصول کے لئے سکالرشپس ڈھونڈنے میں مدد ملے گی۔ وائس چانسلر نے اپنے خطاب میں کہا کہ کارنر میں جدید کمپیوٹرز بھی لگائے جائیں گے تاکہ طلبا ء کو اپنے تعلیم و تحقیق میں مدد ملے۔
