عمران خان نے حکومت کو مطالبات تسلیم نہ کرنے پر سول نافرمانی کی دھمکی دے دی، . بانیء پی ٹی آئی پر درج مقدمات کی تعداد 188 ہو گئی
عمران خان نے حکومت کو مطالبات تسلیم نہ کرنے پر سول نافرمانی کی دھمکی دے دی
اسلام آباد( چترال ٹائمزرپورٹ)پاکستان تحریک انصاف (پی ٹی آئی) کے بانی عمران خان نے حکومت کو خبردار کیا ہے کہ اگر ان کے اہم مطالبات پورے نہیں کیے گئے تو وہ سول نافرمانی کی تحریک شروع کریں گے۔یہ اقدام پی ٹی آئی کے ‘کرو یا مرو’ کے احتجاج کی بظاہر ناکامی کے بعد سامنے آیا ہے، جس کا مقصد ان کی رہائی اور پارٹی کی حمایت حاصل کرنا تھا۔سماجی رابطے کی ویب سائٹ ایکس پر پوسٹ کرتے ہوئے عمران خان نے پانچ رکنی مذاکراتی کمیٹی تشکیل دینے کا اعلان کیا جو دو اہم معاملات پر وفاقی حکومت کے ساتھ مذاکرات کرے گی۔اہم معاملات میں اس وقت مقدمے کا سامنا کرنے والے “سیاسی قیدیوں ” کی رہائی اور 9 مئی 2023 کے مظاہروں کے دوران پی ٹی آئی کے حامیوں پر پرتشدد کریک ڈاؤن اور 26 نومبر کو پی ٹی آئی مظاہرین پر کریک ڈاؤن کی تحقیقات کے لئے ایک عدالتی کمیشن کا قیام کا مطالبہ شامل ہے۔عمران خان نے واضح کیا کہ اگر ان مطالبات کو پورا نہیں کیا گیا تو وہ 14 دسمبر سے سول نافرمانی کی تحریک شروع کریں گے۔سیاسی قیدیوں کے مطالبے کے علاوہ، عمران خان نے 13 دسمبر کو پشاور میں ایک بڑے جلسے کا اعلان کیا ہے تاکہ ان شہداء کو خراج عقیدت پیش کیا جا سکے جو پی ٹی آئی رہنما کے مطابق اسلام آباد احتجاج کے دوران مارے گئے تھے۔انہوں نے دعویٰ کیا کہ پی ٹی آئی کے بہت سے کارکن اب بھی لاپتہ ہیں اور انہوں نے سپریم کورٹ سے مطالبہ کیا کہ وہ انسانی حقوق کی خلاف ورزیوں کے خلاف کارروائی کرے۔ انہوں نے کہا کہ ہم نے انسانی حقوق کی سنگین خلاف ورزیوں پر سپریم کورٹ، لاہور اور اسلام آباد ہائی کورٹ سے رجوع کیا لیکن کوئی کارروائی نہیں کی گئی۔
بانیء پی ٹی آئی پر درج مقدمات کی تعداد 188 ہو گئی
اسلام آباد(سی ایم لنکس)بانی ء پی ٹی آئی کے خلاف ملک بھر میں درج مقدمات کی تعداد 188 تک پہنچ گئی۔وزارتِ داخلہ کی رپورٹ کے مطابق پنجاب میں بانیء پی ٹی آئی کے خلاف 99 اور خیبر پختون خوا میں 2 مقدمات درج ہیں۔اسلام آباد پولیس کی رپورٹ کے مطابق اسلام آباد میں بانیء پی ٹی آئی کے خلاف 76 مقدمات درج ہیں۔ایف آئی اے میں بانیء پی ٹی آئی پر 7 مقدمات اور انکوائریز زیرِ التواء ہیں۔رپورٹ کے مطابق نیب میں بانیء پی ٹی آئی کے 3 مقدمات زیرِ التواء ہیں۔توشہ خانہ فوجداری کیس میں سزا کے خلاف بانیء پی ٹی آئی کی اپیل بھی زیرِ التواء ہے۔بانیء پی ٹی آئی پر اکتوبر، نومبر اور دسمبر میں احتجاج سے متعلق بھی مقدمات درج ہوئے ہیں۔
بشریٰ بی بی نے ڈی چوک دھرنے میں جاں بحق کے لواحقین کو ایک ایک کروڑ کے امدادی چیک دیدیے
چارسدہ (چترال ٹائمزرپورٹ ) بشریٰ بی بی نے ڈی چوک دھرنے میں جاں بحق کارکنوں کے لواحقین میں ایک ایک کروڑ روپے کے امدادی چیک تقسیم کردیے۔ بانی پی ٹی آئی کی اہلیہ بشریٰ بی بی نے چارسدہ کا مختصر دورہ کیا اور ڈی چوک میں جاں بحق ہونے والے دو شہداء کے لواحقین سے ملاقات کی۔ بشری بی بی نے پی ٹی آئی کارکنوں کی قربانیوں کو خراج تحسین پیش کیا۔بشریٰ بی بی کے ہمراہ ایم این اے فیصل امین خان گنڈا پور، صوبائی وزیر فضل شکور خان اور چارسدہ کے دیگر ایم این اے اور ایم پی ایز بھی موجود تھے۔بشریٰ بی بی نے خیبر پختونخوا حکومت کی طرف سے جاں بحق کارکنوں کے لواحقین کو ایک ایک کروڑ روپے کا امدادی چیک بھی دیا۔ بشریٰ بی بی نے جاں بحق کارکن تاج الدین کے نام سے گرلز ہائی اسکول قائم کرنے کا بھی اعلان کیا۔