صوبائی ٹرانسمیشن لائن بچھائی جا رہی ہے جس کے ذریعے صوبائی بجلی گھروں سے پیدا ہونے والی بجلی صنعتوں کو سستے نرخوں پر فراہم کی جائے گی۔ وزیراعلیٰ
صوبائی ٹرانسمیشن لائن بچھائی جا رہی ہے جس کے ذریعے صوبائی بجلی گھروں سے پیدا ہونے والی بجلی صنعتوں کو سستے نرخوں پر فراہم کی جائے گی۔ وزیراعلیٰ
پشاور(چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور سے گزشتہ روز سرحد چیمبر آف کامرس اینڈ انڈسٹریز کے وفد نے وزیر اعلیٰ ہاوس پشاور میں ملاقات کی اور وزیر اعلیٰ کو صوبے کے صنعتکاروں اور تاجروں کو درپیش مسائل سے تفصیلی آگاہ کیا۔ صوبائی کابینہ اراکین مینا خان آفریدی ، عبد الکریم تورڈھیر، محمد اسرار کے علاوہ محکمہ صنعت کے حکام بھی ملاقات میں شریک ہوئے۔ وزیر اعلیٰ نے صوبے کے صنعتکاروں اور تاجر برادری کو درپیش مسائل ترجیحی بنیادوں پر حل کرنے کی یقین دہانی کرائی اور کہا کہ صنعت و تجارت کے شعبے کو ترقی دے کر ہی بے روزگاری پر قابو پایا جا سکتا ہے۔
انہوں نے مزید کہا کہ خیبر پختونخوا میں سرمایہ کاری کےلئے ماحول مکمل ساز گارہے، سرمایہ کار بلاجھجک سرمایہ کاری کریں۔ صوبے میں مختلف شعبہ جات میں سرمایہ کاری کے وسیع مواقع موجود ہیں، صوبائی حکومت سرمایہ کاروں کو ہر ممکن سہولت فراہم کرے گی۔ وزیر اعلیٰ نے صنعتکاروں کو مائننگ کے شعبے میں بھی سرمایہ کاری کی دعوت دی اور کہا کہ مائننگ کے شعبے کو جدید خطوط پر ترقی دینے کےلئے صوبائی حکومت نے اپنی مائننگ کمپنی بنا لی ہے۔
اس کے علاوہ سرمایہ کاروں کو ون ونڈو کے ذریعے تمام تر سہولیات آن لائن فراہم کرنے اور کاروبار کو آسان بنانے کےلئے نیا قانون لایا جا رہا ہے۔ مزید برآں صوبائی ٹرانسمیشن لائن بچھائی جا رہی ہے جس کے ذریعے صوبائی بجلی گھروں سے پیدا ہونے والی بجلی صنعتوں کو سستے نرخوں پر فراہم کی جائے گی۔ اگلے چند سالوں میں زیر تعمیر بجلی گھروں سے تقریباً 800 میگا واٹ بجلی پیدا ہوگی۔ وزیر اعلیٰ کا کہنا تھا کہ صوبائی حکومت تجارتی شعبے کو فروغ دینے کےلئے نئی لیز پالیسی لا رہی ہے تاکہ سرمایہ کار اطمینان کے ساتھ اپنا سرمایہ کسی پراجیکٹ میں لگائیں۔
علاوہ ازیں پشاور میں بی آر ٹی کے کمرشل پلازے بھی رواں سال جون تک مکمل ہو جائیں گے۔ انہوں نے مزید کہا کہ صنعتکاروں کو صوبائی ٹیکسوں کی مد میں بھی ریلیف دیا جائے گا تاکہ صوبے میں صنعتوں کو فروغ مل سکے۔ اس کے علاوہ صنعتکاروں و تاجروں کے وفاق سے جڑے مسائل وفاقی حکومت کے ساتھ اٹھائے جائیں گے۔ وزیر اعلیٰ نے یہ بھی کہا کہ پشاور میں ٹریفک کا مسئلہ مستقل بنیادوں پر حل کرنے کےلئے 7 نئے انڈر پاسز تعمیر کیے جائیں گے۔ وفد نے صنعتکاروں و تاجروں کے مسائل حل کرنے کےلئے ہدایات جاری کرنے پر وزیر اعلیٰ کا شکریہ ادا کیا اور کہا کہ صنعتکار صوبے کی تعمیر و ترقی میں حکومت کو بھرپور تعاون فراہم کریں گے۔