صنعت و تجارت اور سرمایہ کاری سے متعلق صوبائی حکومت کے بورڈز میں چیمبر آف کامرس اینڈ انڈسٹریز کے نمائندے شامل کئے جائیں گے۔ وزیراعلیٰ خیبرپختونخوا
پشاور ( چترال ٹائمزرپورٹ ) وزیر اعلیٰ خیبرپختونخوا علی امین خان گنڈاپور سے فیڈریشن آف پاکستان چیمبرز آف کامرس اینڈ انڈسٹری کے ایک وفد نے گزشتہ روز ان کے دفتر میں ملاقات کی اور خیبرپختونخوا میں صنعتی و تجارتی سرگرمیوں کے فروع اور صنعت و تجارت کے شعبے کو درپیش مسائل کے حل سے متعلق امور کے علاوہ صوبے میں نجی سرمایہ کاری کے فروغ کے لئے صوبائی حکومت کے اقدامات پر تبادلہ خیال کیا۔
وزیر اعلیٰ کے معاون خصوصی برائے صنعت عبد الکریم، سیکرٹری صنعت اور دیگر متعلقہ حکام بھی ملاقات میں موجود تھے۔ وفد سے گفتگو کرتے ہوئے وزیر اعلیٰ نے تجارتی و صنعتی شعبے کی بہتری کے لیے متعلقہ محکموں اور چیمبرز آف کامرس اینڈ انڈسٹریز کے درمیان قریبی روابط اور پالیسی سازی میں باہمی مشاورت کی ضرورت پر زور دیتے ہوئے کہا کہ خیبر پختونخوا کی موجودہ حکومت شعبہ صنعت و تجارت کو ترقی دینے اور اس شعبے کو درپیش مسائل کے حل کے لیے ایک جامع حکمت عملی کے تحت کام کر رہی ہے۔
انہوں نے کہا ہم ایک ایسا ٹھوس اور جامع نظام چاہتے ہیں جس میں تمام مسائل کا کل وقتی حل موجود ہو، ایز آف ڈوئنگ بزنس ایکٹ حتمی مراحل میں ہے جس میں ون ونڈو آپریشن کے تحت صنعت کاروں، تاجروں اور سرمایہ کاروں کو تمام سہولیات دستیاب ہونگی اور اس مقصد کے لئے انڈسٹریل پالیسی 2025 پر بھی کام جاری ہے، اس مقصد کے لئے چیمبر آف کامرس سے منسلک ماہرین اپنی تجاویز دیں تاکہ ایک مضبوط اور قابل عمل نظام وضع کیا جا سکے۔
معیشت کی ترقی اور روزگار کے مواقع پیدا کرنے میں صنعتوں کے کردار کو کلیدی قرار دیتے ہوئے انہوں نے کہا کہ صوبے میں نجی سرمایہ کاری کے بے پناہ مواقع موجود ہیں، صوبائی حکومت صوبے میں سرمایہ کاری کے لئے نجی سرمایہ کاروں کی نہ صرف حوصلہ افزائی کرے گی بلکہ انہیں تمام سہولیات بھی فراہم کرے گی،صوبائی حکومت اپنی بجلی کی پیداوار کو رعایتی نرخوں پر مقامی صنعتوں کو فراہم کرنے پر بھی کام کر رہی ہے۔
وزیر اعلی کا مزید کہنا تھا کہ صنعت و تجارت اور سرمایہ کاری سے متعلق صوبائی حکومت کے بورڈز میں چیمبر آف کامرس اینڈ انڈسٹریز کے نمائندے شامل کئے جائیں گے اور ہماری خواہش اور کوشش ہے کہ بہتر نتائج اور پائیدار ترقی کے لئے نجی سیکٹر کے ماہرین کے ساتھ مل کر کام کریں۔ انہوں نے کہا کہ صوبائی حکومت صنعتکاروں کو درپیش مسائل ترجیحی بنیادوں پر حل کرنے کے لیے پرعزم ہے، ہم نے اپنے دائرہ اختیار میں موجود ٹیکسز کے سلسلے میں ہر ممکن ریلیف دیا ہے، ہمارا حتمی مقصد صوبے میں کاروباری سرگرمیوں کو فروغ دینا اور مقامی معیشت کو مستحکم بنانا ہے۔
علی امین گنڈاپور کا کہنا تھا کہ صوبائی حکومت نے کاروبار کے فروغ کے لیے بلاسود قرضوں کے مختلف پروگرامز شروع کر رکھے ہیں، فنی تعلیم میں ڈگری ہولڈرز کو بلاسود قرض کی فراہمی کے پروگرام کا بھی اجراء کیا گیا ہے، ہوم سٹے ٹورازم پراجیکٹ کے اجراء کے لیے مفاہمتی یاداشت پر دستخط ہو چکے ہیں، یہ صوبائی حکومت کا منفرد اقدام ہے جس سے سیاحت اور روزگار دونوں کو فروغ ملے گا۔
علی امین گنڈاپور نے کہا کہ صحت عامہ کے تحفظ کے لئے اشیاء خوردونوش کے معیار کو یقینی بنانے کے لئے اقدامات کئے جا رہے ہیں، صنعتوں کے مالکان کو وسیع تر عوامی مفاد کے پیش نظر اس سلسلے میں حکومت کے ساتھ تعاون کریں۔ وفد نے صنعتی و تجارتی سرگرمیوں کے فروغ کے لئے صوبائی حکومت کے اقدامات کو سراہا اور صنعت کاروں اور تاجروں کے مسائل کے حل میں دلچسپی لینے پر وزیر اعلی کا شکریہ ادا کیا۔