صدر مملکت کی بینک فراڈ سے متاثرہ شہری کو رقم واپس کرنے کی ہدایت، بینک کی اپیل کو مسترد کردیا
صدر مملکت کی بینک فراڈ سے متاثرہ شہری کو رقم واپس کرنے کی ہدایت، بینک کی اپیل کو مسترد کردیا
اسلام آباد(چترال ٹائمزرپورٹ)صدر مملکت ڈاکٹر عارف علوی نے بینک فراڈ سے متاثرہ شہری کو 344,600 روپے واپس کرنے کی ہدایت کر دی۔اس حوالے سے انہوں نے بینکنگ محتسب کا حکم برقرار رکھتے ہوئے الائیڈ بینک کی اپیل کو مسترد کردیا ہے۔ بدھ کو ایوانِ صدر کے پریس ونگ سے جاری بیان کے مطابق صدر مملکت نے کہا کہ الائیڈ بینک کے صارف کے اکاؤنٹ سے 344,602 روپے دھوکہ دہی سے نکالے گئے، بینک نے صارف کی رضامندی کے بغیر فنڈ منتقلی سہولت کھول کر بدانتظامی کا ارتکاب کیا۔ صدر مملکت نے کہا کہ بلااجازت آن لائن فنڈ ٹرانسفر سہولت کھولنے کی وجہ سے صارف کو نقصان اٹھانا پڑا۔صدر مملکت نے بینکنگ محتسب کے فیصلے کے خلاف الائیڈ بینک کی دائر کردہ درخواست پر فیصلہ سناتے ہوئے کہا کہ بینک قانونی ذمہ داری ادا کرنے میں ناکام رہا، بلااجازت انٹرنیٹ بینکنگ چینل کھول بے ضابطگی اور عدم تعمیل کا ارتکاب کیا۔انہوں نے کہا کہ شکایت کنندہ کو بینک ہیلپ لائن سے ملتے جلتے نمبر سے فون کال موصول ہوئی اور کال کے بعد اکاؤنٹ سے 344,602 روپے کی رقم منتقل کی گئی۔ ڈاکٹر عارف علوی نے کہا کہ صارف نے ماضی میں آن لائن چینلز کے ذریعے کوئی لین دین نہیں کیا۔ تفصیلات کے مطابق امیر علی وسان نے فراڈ کے فوری بعد شکایت درج کروائی تاہم شکایت حل نہ ہوئی جس پر صارف نے کھوئی ہوئی رقم کی واپسی کے لیے بینکنگ محتسب سے رجوع کیا۔ محتسب نے بینک کو رقم واپس کرنے کی ہدایت کی مگر بینک نے فیصلے کے خلاف صدر کو اپیل دائر کردی۔صدر مملکت نے کیس کی ذاتی طور پر سماعت کی اور بینک کی اپیل کو مسترد کردیا۔ صدر مملکت نے کہا کہ بینک ادائیگی کے نظام اور الیکٹرانک فنڈز ٹرانسفر ایکٹ 2007 کے سیکشن 41 کے مطابق متنازعہ لین دین کی قانونی حیثیت ثابت کرنے میں ناکام رہا، رقم کی قسطوں میں منتقلی ایک ہی تاریخ پر بہت ہی مختصر وقت میں ایک ہی طرز پر کی گئی۔ انہوں نے کہا کہ رقم منتقلی پر بینک سسٹم الرٹ ہونا چاہیے تھا، کم از کم صارف کو کال جانی چاہیے تھی۔ صدر مملکت نے کہا کہ اس تشویشناک امر پر بینکوں اور سٹیٹ بینک کو توجہ دینی چاہیے،شہری ڈیجیٹل بینکنگ، جدید ٹیکنالوجی پر مبنی بینکنگ مصنوعات سے واقف نہیں۔ صدر نے کہا کہ بینک آن لائن چینلز کے حوالے سے قوانین اور سٹیٹ بینک کی ہدایات کی تعمیل کرنے میں ناکام رہا ہے۔ صدر مملکت نے بینک کی اپیل مسترد کرتے ہوئے ہدایت کی کہ 30 دنوں کے اندر بینکنگ محتسب کو تعمیل کی رپورٹ جمع کرائیں۔
بی آئی ایس پی ملک کے ضرورت مند گھرانوں کو مالی امداد فراہم کرنے کے لیے پرعزم ہے، چیئرپرسن ڈاکٹر محمد امجد ثاقب
اسلام آباد(سی ایم لنکس)چیئرپرسن بینظیر انکم سپورٹ پروگرام (بی آئی ایس پی) ڈاکٹر محمد امجد ثاقب نے کہا ہے کہ بی آئی ایس پی ملک کے ضرورت مند گھرانوں کو مالی امداد فراہم کرنے کے لیے پرعزم ہے۔ پشاور کی سٹی یونیورسٹی مسجد میں بی آئی ایس پی کے ملازمین کے ایک اجتماع سے خطاب کرتے ہوئے ڈاکٹر محمد امجد ثاقب نے ضرورت مند خاندانوں کی مالی مشکلات کو دور کرنے کی اخلاقی ذمہ داری پر زور دیا اور انہیں غربت سے نکالنے کے لیے حکمت عملی کا خاکہ پیش کیا۔مستحق خاندانوں کے لیے بی آئی ایس پی کے مستند ڈیٹا کے حامل ہونے پر روشنی ڈالتے ہوئے ڈاکٹر امجد ثاقب نے مخیر حضرات پر زور دیا کہ وہ‘مواخات’کے اصولوں کو اپناتے ہوئے پسماندہ خاندانوں کی مدد کریں۔ انہوں نے ضرورت مند خاندانوں کی فلاح و بہبود کے لیے وقف فنڈ کے قیام کی تجویز پیش کی۔ اپنے خطاب میں ڈاکٹر امجد ثاقب نے غریب خاندانوں کے بچوں کو تکنیکی مہارت کے شعبوں سے منسلک کرنے کی ضرورت پر زور دیا۔ڈاکٹر امجد ثاقب نے شفافیت کو یقینی بنانے کے لیے وظائف کی ادائیگی کے لیے پوائنٹ آف سیل (پی او ایس) ایجنٹوں کے ساتھ بات چیت کی ضرورت پر بھی زور دیا۔ پشاور میں بی آئی ایس پی کے تحصیل آفس کے دورے کے دوران ڈاکٹر امجد ثاقب نے ضرورت مند خواتین سے ملاقات کی، عملے کو دستیاب وسائل کو استعمال کرتے ہوئے سہولیات فراہم کرنے کی ہدایت کی۔ڈاکٹر امجد ثاقب نے ملازمین پر زور دیا کہ وہ دفاتر میں صفائی کے معیار کو برقرار رکھیں، ضرورت مند خواتین کے ساتھ حسن سلوک کا مظاہرہ کریں۔ اجتماعی ذمہ داری پر زور دیتے ہوئے انہوں نے کہا کہ بینظیر انکم سپورٹ پروگرام کو ایک مثالی ادارہ بنانا ہمارا فرض ہے۔ ڈاکٹر امجد ثاقب نے سٹی یونیورسٹی پشاور میں طلباء سے بات چیت بھی کی۔ انہوں نے مجموعی ترقی کے لیے روایتی تعلیم اور عملی تربیت دونوں کی اہمیت کو اجاگر کیا۔ انہوں نے کہا کہ کامیاب افراد کا تجربہ اور پیشہ ورانہ طریقہ کاروبار کی ترقی میں معاون ثابت ہو سکتا ہے۔