صحت کارڈ پلس پروگرام کےتحت خیبرپختونخوا میں گزشتہ 2برس میں علاج کرنے والوں کی تعداد 1452250رہی جن میں 776397خواتین اور675853مردوں نے ہسپتالوں سے رجوع کیا۔ محکمہ صحت حکام
پشاور(چترال ٹایمزرپورٹ)صحت کارڈ پلس پروگرام میں ضرور خامیاں ہو سکتی ہیں تاہم اس پروگرام کے تحت مفت صحت طبعی سہولیات عوام کیلئے کسی نعمت سے کم نہیں۔محکمہ صحت حکام کا کہنا ہے کہ صحت کارڈ پلس پروگرام کے حوالے سے تمام شکایات پر انکوائری ہوتی ہے اور اسپتال کے قصور وار ہونے پر پہلی بار انہیں انتباہ کیا جاتا ہے،دوسری بار شکایت پر معطلی ہوتی ہے اور تیسری شکایت پر اسپتال کیساتھ معاہدہ ختم کیا جاتا ہے۔محکمہ صحت خیبرپختونخوا حکام کے مطابق خیبرپختونخوا میں گزشتہ 2برس میں علاج کرنے والوں کی تعداد 1452250رہی جن میں 776397خواتین اور675853مردوں نے ہسپتالوں سے رجوع کیا۔ صحت کارڈ پلس حکام کے مطابق سب سے زیادہ بیمار افراد کا علاج پشاور میں ہوا جن کی تعداد155251رہی ان میں خواتین کی تعداد79ہزاراور مردوں کی تعداد 75965رہی،سوات میں 1لاکھ34ہزار 309ہے جن میں 76ہزار 991خواتین اور مرد 57ہزار 318ہے،صوابی میں 1لاکھ 2ہزار655افراد کا علاج ہوا جن میں 54ہزار خواتین اور48ہزار مرد ہیں،مردان میں 73ہزار خواتین اور 55ہزار مردوں کا علاج ہوا،ایبٹ آباد میں 40ہزار خواتین اور39ہزار کاعلاج کیا گیا،باجوڑ میں 7ہزارخواتین اور5800مردوں کا علاج کیا گیا،چارسدہ میں 48ہزار خواتین اور 42ہزار مردوں کا علاج کیا گیا،لوئر دیر میں 54ہزار خواتین اور42ہزار مردوں کا علاج کیا گیا،نوشہرہ میں 34ہزار خواتین اور 30ہزار مرد ہسپتال میں علاج کیلئے آئے۔اعدادوشمار کی مطابق88ہزار435امراض قلب میں مبتلا افراد ہسپتالوں میں زیر علاج رہے جن پر ریکارڈ11ارب33کروڑروپے خرچ کئے گئے جبکہ2لاکھ46ہزارافراد کا ڈائیلاسزکیا گیا جن پر1ارب92لاکھ روپے خرچ ہو گئے۔
آغاخان یونیورسٹی کی جانب سے جاری سروے رپورٹ کے مطابق صحت کارڈ کے تحت 63 فیصد مریضوں نے نجی جبکہ 37 فیصد نے سرکاری ہسپتالوں سے علاج کیا۔ اسی طرح 65 فیصد مریضوں نے ضلعی، 35 فیصد نے بڑے ہسپتالوں سے علاج کرایا جبکہ 63 فیصد مریض مقامی ہسپتال میں علاج کو ترجیح دیتے ہیں۔تیس فیصد دیگر اضلاع، 6.2 فیصد لوگوں نے دیگر صوبوں کے ہسپتالوں سے علاج کرایا۔سروے رپورٹ کے حوالے سے مزید بتایا گیا کہ 10 فیصد شہری صحت کارڈ کی سہولت سے تاحال محروم ہیں، علاج سے محروم 44 فیصد شہریوں کو ڈومیسائل یا شہریت کے مسائل درپیش ہیں۔سروے میں بتایا گیا کہ 84 فیصد شہریوں نے علاج میں او پی ڈی شامل کرنے کی تجویز دی یے، سروے رپورٹ میں اخراجات کے حوالے سے بتایا گیا کہ ایک مریض کے علاج پر اوسطا 31 ہزار 395 روپے خرچہ آتا ہے، اخراجات نجی ہسپتالوں کے مقابلے میں 20 سے 40 فیصد مہنگے ہیں۔
سروے میں سفارشات پیش کرتے ہوئے بتایا گیا کہ صحت کارڈ پلس پالیسی بورڈ میں شہریوں کو شامل کیا جائے اورتکنیکی خامیوں کو دور کرکے دور افتادہ علاقوں میں ہسپتالوں کی استعداد کار بہتر بنائی جائے۔صحت کارڈ پلس خیبر پختونخوا حکام کا کہنا ہے کہ صحت کارڈ پہ علاج کے لیے خرچہ آتا ہے جو سٹیٹ لائف ادا کرتا ہے اور سٹیٹ لائف کو پیسے حکومت دیتی ہے لیکن جب سٹیٹ لائف کو بروقت پیسوں کی ادائیگی نہیں ہوتی تو وہ ایک نوٹس جاری کرتے ہیں اور اس کے بعد میڈیا میں بھی یہ خبر پھیل جاتی ہے تاہم یہ صرف نوٹس ہوتا ہے اور مفت علاج کا سلسلہ جاری ہوتا ہے۔انہوں نے کہا کہ اگر سٹیٹ لائف کو بروقت پیسوں کی ادائیگی ہوجائے تو نوٹس نہیں آئیں گے تاہم جب بھی نوٹس آتا ہے تو حکومت متحرک ہوجاتی ہے اور پیسوں کی ادائیگی کردی جاتی ہے. انہوں نے کہا ہے کہ صحت کارڈ پلس کی سہولیات معطل ہونے کے حوالے سے نوٹسز مستقبل میں بھی آتے رہیں گے تاہم اس پہ علاج کا سلسلہ جاری رہے گا۔حکام کے مطابق خیبر پختونخوا میں اب تک صحت کارڈ پر 22 لاکھ سے زائد افراد کا علاج کیا جا چکا ہے جبکہ مالی سال 22۔23 میں اب تک 13 لاکھ صحت کارڈ سے مستفید ہوچکے ہیں۔
حکام کے مطابق صحت کارڈ اپنی نوعیت کا ایک بہت اچھا منصوبہ ہے کیونکہ اس کی وجہ سے لوگوں کو علاج کی مفت ملی ہے اور اگر یہ نہ ہوتا تو شاید بہت سارے غریب لوگ علاج سے محروم رہ جاتے۔حکام نے بتایا کہ جن ہسپتالوں میں صحت کارڈ پہ علاج ہوتا ہے وہاں سٹیٹ لائف کا فیسلیٹشن ڈیسک ہوتا ہے جہاں لوگ جاکر شکایات درج کرواسکتے ہیں، وہاں فوری طور پر شکایات کا ازالہ کیا جاتا ہے۔ انہوں نے کہا کہ 080089898 پر بھی لوگ کال کرسکتے ہیں، یہ ٹول فری نمبر 24 گھنٹے فعال ہوتا ہے،بڑے ہسپتالوں میں شکایات بکسز میں بھی لوگ کمپلینٹ ڈال سکتے ہیں۔ محکمہ صحت خیبرپختونخوا حکا م کا کہنا ہے کہ عوام صحت کارڈ کے حوالے سے پریشان نہ ہو یہ منصوبہ جاری رہے گا اور لوگوں کو علاج کی مفت سہولیات ملتی رہیں گی،کینیڈا، یورپ کے کچھ ممالک، آسٹریلیا اور جاپان کے بعد خیبر پختونخوا پہلا صوبہ بن گیا جہاں صحت کی سہولت اب مفت ہوگی، کسی کے مذہب، ذات اور سیاسی وابستگی کی پرواہ کئے بغیر ہر خیبرپختونخوا کی شہری کو دس لاکھ روپے ہیلتھ انشورنس فراہم کی جائی گی۔تیمارداروں کے مطابق حکومت اس پروگرام کی عوام تک رسائی کو مزید سادہ اور آسان بنا سکتی ہے۔صحت سہولت پروگرام کے تحت ایک خاندان کے تمام افراد کے لیے 10 لاکھ روپے سالانہ مقرر کیے گئے ہیں، تاہم اس کا طریقہ کار یہ ہے کہ گھر کے کسی ایک فرد پر یہ تمام رقم خرچ نہیں کی جاتی بلکہ اس میں خاندان کے ہر فرد کے لیے ایک حد مقرر کر دی گئی ہے۔اس پروگرام کی دستیاب معلومات کے مطابق ترجیحی علاج میں بیماریوں کی فہرست یہ ہے۔صحت کارڈ پلس پروگرام کا آغاز پہلی مرتبہ 2015 میں ہوا تھا، اس دوران خیبر پختونخوا کی تین فیصد آبادی کو یہ سہولت فراہم کی گئی تھی۔ 2016 میں یہ پروگرام دوسرے مرحلے میں داخل ہوا اور 2017 میں 64 فی صد آبادی کو یہ سہولت مہیا کی گئی تھی جو اب تک جاری ہے۔
خیبر پختونخوا کے عوام کے لئے باقاعدہ نئے چینل پی ٹی وی نیشنل پشاور کی نشریات شروع کردی گئی ہیں،مریم اورنگزیب کا ٹویٹ
اسلام آباد( چترال ٹایمز رپورٹ )وفاقی وزیر اطلاعات ونشریات مریم اورنگزیب کی ہدایت پر خیبر پختونخوا کے عوام کو 24 گھنٹے تفریح، حالات حاضرہ اور خبروں سے باخبر رکھنے کے لئے باقاعدہ نئے چینل پی ٹی وی نیشنل پشاور کی نشریات شروع کردی گئی ہیں۔ہفتہ کو اپنے ایک ٹویٹ میں وفاقی وزیراطلاعات نے کہاہے کہ پی ٹی وی نیشنل پشاور پر خیبر پختونخواہ کے عوام کے لئے 24 گھنٹے پشتو زبان میں ڈرامے، موسیقی، حالات حاضرہ کے پروگرامز اور خبروں سمیت بہترین نشریات دیکھنے کو ملیں گی۔ انہوں نے کہاکہ پی ٹی وی نیشنل پشاور کی نشریات یوٹیوب پر بھی 24 گھنٹے ناظرین دیکھ سکتے ہیں۔
پرویز خٹک سمیت پی ٹی آئی چھوڑنے والے سینئر سیاستدانوں کے لیگی قیادت سے رابطے
لاہور(سی ایم لنکس)پاکستان تحریک انصاف چھوڑنے والے سینئر سیاست دانوں اور پاکستان مسلم لیگ ن میں رابطوں کا انکشاف ہوا ہے۔پارٹی ذرائع کے مطابق پی ٹی آئی کے سابق سینئر رہنما پرویز خٹک کے مسلم لیگ ن کی اعلیٰ قیادت سے بیک ڈور رابطے ہیں اور مسلم لیگ ن کی اعلیٰ قیادت نے پنجاب کے علاوہ دیگر صوبوں سے پی ٹی آئی کی سابقہ قیادت کی پارٹی میں شمولیت کے لیے گرین سگنل دے دیا ہے۔پرویز خٹک کی پارٹی میں شمولیت پر ن لیگ کے صدر کے پی کے امیر مقام بھی راضی ہیں اور اگر معاملات طے پا گئے تو پرویز خٹک شہباز شریف اور مریم نواز کی موجودگی میں پاکستان مسلم لیگ ن میں شمولیت کا اعلان کریں گے۔ذرائع کا کہنا ہے کہ پرویز خٹک مسلم لیگ ن میں آئے تو خیبر پختونخوا سے پی ٹی آئی کے رہنماؤں اور کارکنوں کی بڑی تعداد کو ساتھ لائیں گے۔ اگر مسلم لیگ ن سے معاملات طے نہ پائے تو پرویز خٹک جمعیت علمائے اسلام(ف) سمیت دیگر سے معاملات کو آگے بڑھائیں گے۔ پرویز خٹک کی جانب سے پی ٹی آئی کے اندر سے اپنا الگ گروپ بنانے کی بھی کوشش جاری ہے۔