شندور فیسٹول میں شرکت کیلئے وزیراعظم پاکستان کو دعوت دینے کے ساتھ تمام مہمانوں کو خوش آمدید کہتے ہیں۔ انجینئر فضل ربی جان ودیگر رہنماوں کی پریس کانفرنس
شندور فیسٹول میں شرکت کیلئے وزیراعظم پاکستان کو دعوت دینے کے ساتھ تمام مہمانوں کو خوش آمدید کہتے ہیں۔ انجینئر فضل ربی جان ودیگر رہنماوں کی پریس کانفرنس
چترال (نمائندہ چترال ٹائمز ) پاکستان پیپلز پارٹی ضلع لویر چترال کے صدر انجینئر فضل ربی جان نے شندور پولو فیسٹول میں شرکت کے لئے وزیر اعظم پاکستان شہباز شریف، وزیر خارجہ بلاول بھٹو زرداری اور آرمی چیف جنرل عاصم منیر کو دعوت دیتے ہوئے کہا ہے کہ دنیا کی بلند ترین پولوگراونڈ میں منعقد ہونے والی اس ایونٹ میں ان کی شرکت سے چترالی عوام کے حوصلے بلند ہوں گے اور پی ٹی آئی دور حکومت میں پیدا شدہ احساس محرومی میں کمی آئے گی۔ منگل کے روز چترال پریس کلب میں پی ڈی ایم کے ضلعی رہنماؤں مولانا عبدالرحمن، عبدالولی خان عابد ایڈوکیٹ، حاجی عیدالحسین، قاری جمال عبدالناصر،صفت زرین، محمد کوثر ایڈوکیٹ، صدر تجار یونین بشیر احمد خان , نائب صدر ڈرائیور یونین آنیس اور دوسروں کی معیت میں پریس کانفرنس سے خطاب کرتے ہوئے انہوں نے کہاکہ چترال اور گلگت بلتستان کے علاوہ ملک کے دیگر شہروں اور بیرون ملک سے ایک لاکھ سے ذیادہ افراد شندور پہنچتے ہیں اوریہاں سیاحت کو ترقی دینے اور علاقے کو بین الاقوامی سطح پر متعارف کرنے کا سب سے بڑا ذریعہ ہے اور تاریخ سے ثابت ہے کہ لواری ٹنل سمیت چترال کے تمام تر میگاپراجیکٹوں کا اعلان اس مقام سے ہوا ہے۔
انہوں نے شندور پولوفیسٹول کے لئے چترال آنے والے تمام ملکی اور غیر ملکی سیاحوں کو چترال کی زمین پر خوش آمدید کہتے ہوئے کہاکہ چترال انتہائی پرامن علاقہ ہے جہاں انہیں امن وامان کے حوالے سے کوئی مشکل درپیش نہیں ہوگا اور چترال کے مہمان نواز عوام اپنے مہمانوں کا اپنی روایتی اورمتاثر کن انداز میں استقبال کے لئے تیار ہیں۔ انجینئر فضل ربی نے کہاکہ گزشتہ دنوں سبسڈائزڈ گندم کے سلسلے میں بعض حلقوں نے احتجاج کرتے ہوئے روڈ بلاک کرکے اس جشن کی تیاریوں اور مہمانوں کی آمد میں رخنہ ڈالنے کی کوشش ضرور کی تھی جس سے ٹورزم انڈسٹری کو وقتی طور پر نقصان لاحق ہوا لیکن اب حالات مکمل طور پر سازگار اور پرامن ہیں۔ انہوں نے کہاکہ شندور روڈ کو بند کرنے کے باتیں کرنے والے معدودے چند لوگ ہیں جبکہ عوام کی اکثریت اس احتجاج سے اپنے آپ کو دور رکھا۔ پی پی پی اور پی ڈی ایم کے رہنماؤں نے اس بات پر زور دیاکہ وزیر اعظم کے دورہ شندور کے دور رس نتائج برامد ہوں گے اور یہاں گندم کے بحران اور روڈ پراجیکٹوں کے بارے میں ان کے اعلانات کے لئے چترالی عوام نہایت بے چینی سے منتظر ہے۔
