Chitral Times

Feb 9, 2025

ﺗﻔﺼﻴﻼﺕ

سعودی عرب میں گرفتار بیگناہ خاندان کو رہائی مل گئی، منشیات کیس میں کلیئر ہوگیا، وزیر داخلہ

شیئر کریں:

سعودی عرب میں گرفتار بیگناہ خاندان کو رہائی مل گئی، منشیات کیس میں کلیئر ہوگیا، وزیر داخلہ

لاہور (چترال ٹائمزرپورٹ) ایئرپورٹ پر بیگ ٹیگ تبدیل کرکے بے گناہ خاندان کو پھنسانے والے انٹرنیشنل ڈرگ گینگ کے 9 ملزمان کو گرفتار کر لیا گیا اور وفاقی وزیر داخلہ و انسداد منشیات محسن نقوی کی خصوصی ہدایت پر اے این ایف کی ٹیم کی دن رات کی کاوشوں سے سعودیہ میں گرفتار بے گناہ خاندان کو رہائی مل گئی اور خاندان کے 5 افراد واپس وطن آگئے۔ وفاقی وزیرداخلہ و انسداد منشیات محسن نقوی آج رہائی پانے والے بے گناہ خاندان کی رہائش گاہ گئے اور خاندان کے افراد سے ملاقات کی۔ ڈی جی اینٹی نارکوٹکس فورس میجر جنرل عبدالمعید بھی ہمراہ تھے۔ وزیر داخلہ و انسداد منشیات محسن نقوی نے متاثرہ خاندان سے دلی ہمدردی کا اظہار کرتے ہوئے رہائی و وطن واپسی پر مبارکباد دی۔ انہوں نے کہا کہ آپ کو جو تکلیف اٹھانا پڑی وہ الفاظ میں بیان نہیں کی جا سکتی، اے این ایف نے دن رات محنت کر کے انٹرنیشنل گینگ کا سراغ لگایا اور اصل ملزمان کو گرفتار کیا۔

 

انہوں نے مزید کہا کہ سعودی عرب کی حکومت نے بھی بہت تعاون کیا، سعودی حکومت کا خصوصا شکریہ ادا کرتا ہوں۔ محسن نقوی نے بے گناہ خاندان کی رہائی کے لیے فوری اقدامات پر ڈی جی اے این ایف میجر جنرل عبدالمعید اور ان کی پوری ٹیم کی کارکردگی کو سراہتے ہوئے کہا کہ اے این ایف کی ٹیم کو اس سلسلے میں خصوصی ایوارڈز دیں گے۔انہوں نے واضح کیا کہ اے این ایف کی ٹیم نے اللہ تعالٰی کو راضی کیا ہے، اے این ایف کی ٹیم نے انتہائی محنت سے کیس لڑا، اسطرح کوئی اپنا بھی کیس نہیں لڑتا۔ متاثرہ خاندان کے ماموں ملک ارشد نے گفتگو کرتے ہوئے کہا کہ ہم آپ اور اے این ایف کی ٹیم کے شکر گزار ہیں۔ متاثرہ شخص ہارون علی نے کہا کہ محسن نقوی اور اے این ایف کے ڈی جی میجر جنرل عبدالمعید نے جو کام ہمارے لئے کیا وہ الفاظ میں بیان نہیں کر سکتے۔

 

ملک عزیز نے کہا کہ آپ کے لئے دل سے دعائیں نکلتی ہیں۔ یادرہے کہ لاہور کی مرغزار کالونی سے ملحقہ علاقے ایل ڈی اے ایمپلائز سوسائٹی فیز ون کی رہائشی فرحانہ اکرم 4 فیملی ممبرز ہارون علی۔ ملک عزیز۔ فوزیہ عزیز اور ذکریا بیگم کے ساتھ 23 دسمبر کو سعودی عرب گئیں، ڈرگ مافیا نے عملے کی ملی بھگت سے فرحانہ اکرم کے بیگ کا ٹیگ تبدیل کیا۔ بعد ازاں فرحانہ اکرم اور ان کے فیملی ممبرز کو 30 دسمبر کو سعودی عرب میں حراست لیا۔ اے این ایف نے کیمروں کی مدد سے تمام انٹری اور ایگزٹ پوائنٹس کا جائزہ لینے کے بعد ایک پورٹر کو حراست میں لے کر تفتیش کی گئی تو پورا گینگ بے نقاب ہوا۔ انٹرنیشنل ڈرگ گینگ کے سرغنہ سمیت 9 ملزمان کو گرفتار کر لیا گیا ہے، اے این ایف نے تمام شواہد سعودی حکام کو دئیے جس پر متاثرہ خاندان کی رہائی ممکن ہوئی۔ اے این ایف کے ریجنل ڈائریکٹر بریگیڈئر سکندر حیات، ڈائریکٹر انفورسمنٹ بریگیڈئر عمران، ڈائریکٹر انٹیلیجنس کرنل کامران اور اعلی حکام بھی اس موقع پر موجود تھے۔

 

 

 

ججز کے تبادلے بدنیتی پر مبنی ہیں، اسلام آباد کے وکلاء کا کل ہڑتال کا اعلان

اسلام آباد(سی ایم لنکس) اسلام آباد کے وکلا رہنماؤں نے کہا ہے کہ ججز کے حالیہ تبادلے عدلیہ میں تقسیم اور بدنیتی پر مبنی ہیں، وکلا تنظیمیں اس عمل کی بھرپور مخالفت کریں گی، کل ملک گیر کنونشنز کا انعقاد کیا جائے گا۔اسلام آباد بار کونسل، اسلام آباد ہائی کورٹ بار ایسوسی ایشن اور ڈسٹرکٹ بار ایسوسی ایشن کے عہدیداروں نے مشترکہ پریس کانفرنس کی۔چیئرمین اسلام آباد بار کونسل علیم عباسی ایڈووکیٹ نے کہا کہ آج ہماری میٹنگ میں اسلام ہائیکورٹ ڈسٹرکٹ اور ہائیکورٹ کے تمام نمائندے موجود ہیں، ہنگامی پریس کانفرنس کا مقصد وزرات قانون نے تین ججز کی اسلام آباد میں ٹرانسفر کی، آج کی میٹنگ میں فیصلہ ہوا ہے کہ وکلاء برداری ان تبادلوں کو مسترد کرتی ہے۔ان کا کہنا تھا کہ یہ ٹرانسفرز عدلیہ میں تقسیم اور بدنیتی پر مبنی ہیں، وکلاء اس عمل کی بھرپور مخالفت کریں گی، کل 11 بجے ڈسٹرکٹ کورٹ جی الیون میں ملک گیر کنونیشن منعقد کرنے جا رہے ہیں۔انہوں نے کہا کہ کل اسلام آباد میں وکلاء مکمل ہڑتال کا اعلان کرتے ہیں، کل کوئی وکیل کسی بھی عدالت میں پیش نہیں ہوگا،

 

پاکستان بھر کے وکلاء سے اپیل کی ہے آپ بھی ہمارا ساتھ دیں، صوبائی بار کونسل سے بھی اپیل کرتے ہیں کل کے احتجاج میں ہمارا ساتھ دیں۔علیم عباسی ایڈووکیٹ کا کہنا تھا کہ 10 فروری کے جوڈیشل کمیشن اجلاس کی بھی مذمت کرتے ہیں، جوڈیشل کمیشن اجلاس بھی بدنیتی پر بلایا گیا، 26 آئینی ترمیم کے خلاف تمام درخواستوں کو فی الفور سنا جائے۔صدر اسلام آباد ہائیکورٹ بار ایسوسی ایشن ریاست علی آزاد نے کہا کہ ہڑتال اور کنونشن کا ہمارا متفقہ فیصلہ ہے، لاہور ہائیکورٹ کا پندرہویں نمبر کا جج، بلوچستان کے بارہویں نمبر کے ججز کو یہاں کیوں لایا جا رہا ہے، لاہور ہائیکورٹ میں دو لاکھ کیسز التواء میں ہے۔انہوں نے کہا کہ اسلام آباد ہائیکورٹ سے صوبوں میں کتنی تعیناتیاں ہوئی ہیں؟ اسلام آباد ہائیکورٹ کا گناہ یہ ہے کہ وہ عدلیہ کی آزادی چاہتی ہے۔ریاست علی آزاد کا کہنا تھا کہ اسلام آباد ہائیکورٹ کے ججز آئین و قانون کے فیصلے کر رہے ہیں، اسلام آباد ہائیکورٹ کو فتح کرنے کی کوشش کی جا رہی ہیں، کل بھی لاہور میں کنونشن منعقد ہوا کالے کوٹ کیساتھ عوام کی بھی ذمے داری ہے، پاکستان میں اس وقت اندھیرا ہے قانون اور انصاف بھول جائیں۔انہوں نے کہا کہ کل کنونشن کے بعد ریلی بھی نکالی جائے گی، پیکا ایکٹ کے ذریعے میڈیا کو فتح کر لیا گیا، پارلیمنٹ اور سپریم کورٹ کے بعد عدلیہ کو فتح کیا جا رہا ہے،

 

کنٹرولڈ سسٹم کو نظام نہیں کہہ سکتے، سینئر موسٹ جج کو چیف جسٹس بنانا تھا 26 ویں آئینی ترمیم میں بھی یہی لکھا ہے۔صدر اسلام آباد ہائیکورٹ بار ایسوسی ایشن کا کہنا تھا کہ آئینی ترمیم بھی بدنیتی پر مبنی تھی اس کے باوجود ٹرانسفر کئے جا رہے ہیں، اسلام آباد ہائیکورٹ کا سینئر موسٹ جج کو میٹنگ میں نہیں بٹھایا جاتا، کیونکہ محسن اختر کیانی کہتا ہے آئین و قانون کے مطابق فیصلے کرو، آٹھ ججز کو بیٹھا کر آپ فیصلہ دیتے ہیں تو ہم اس کی بات نہیں کر رہے، ہم ترقیوں سے قبل سپریم کورٹ ججز کے فیصلے کو مانیں گے۔صدر ڈسٹرکٹ بار ایسوسی ایشن نعیم علی گجر نے کہا کہ اسلام آباد کے وکلاء کو ماضی میں 10 کور کا خطاب ملتا رہا ہے، جب قانون پاس ہونا ہوتا ہو یا کوئی آئینی شکنی ہو تو وکلاء ہی سامنے آتے ہیں، سیاسی جماعتیں جب اقتدار میں آتی ہیں تو ماضی کو بھول جاتی ہیں، تین ججوں میں ایسا کیا کمال ہے؟ پنجاب بلوچستان اور سندھ سے یہاں ٹرانسفر کیا جا رہا ہے۔ان کا کہنا تھا کہ تینوں تعیناتیاں سازش اور بدنیتی پر مبنی ہیں، عوام دیکھ رہی ہے اسلام آباد ہائیکورٹ کے ججز کو عتاب میں لانے کیلئے یہ اقدام کیا جارہا ہے، جس طریقے سے آئین و قانون کی دھجیاں بکھیری جا رہی ہیں۔انہوں نے کہا کہ ہم کس جج یا شخصیت کیساتھ نہیں، ہم عدلیہ اور آئین کے ساتھ کھڑے ہیں، تین سینئر ججز میں سے ایک کو چیف جسٹس بنانا ہوگا، وکلاء باہر سے آنے والے جج کے خلاف بھرپور احتجاج اور مزاحمت کریں گے، کل ہم ہڑتال کا اعلان کر رہے ہیں حکومت اور اپوزیشن آئین و قانون کی دھجیاں نہ بکھیریں۔

 

 

 


شیئر کریں:
Posted in تازہ ترین, جنرل خبریںTagged
98726