Chitral Times

Jul 15, 2024

ﺗﻔﺼﻴﻼﺕ

دینی مدارس اور خصوصی صلاحیت کے حامل بچوں کیلئے سپورٹس ایونٹ، وزیراعلیٰ نے انٹر مدارس گیمز 2024 میں ونر ،  رنراپ اور تیسرے نمبر پر آنے والی ٹیموں کیلئے 50,50 لاکھ روپے انعام کا اعلان کردیا

Posted on
شیئر کریں:

دینی مدارس اور خصوصی صلاحیت کے حامل بچوں کیلئے سپورٹس ایونٹ، وزیراعلیٰ نے انٹر مدارس گیمز 2024 میں ونر ،  رنراپ اور تیسرے نمبر پر آنے والی ٹیموں کیلئے 50,50 لاکھ روپے انعام کا اعلان کردیا

پشاور ( چترال ٹائمزرپورٹ )وزیر اعلیٰ خیبر پختونخوا سردار علی امین خان گنڈاپورنے دینی مدارس اور خصوصی صلاحیت کے حامل بچوں کیلئے سپورٹس ایونٹ کے انعقاد کو خوش آئند قرار دیا ہے اور کہا ہے کہ ان ایونٹس کے انعقاد سے نئے ٹیلنٹ کو سامنے لانے میں مدد ملے گی ۔ صوبائی حکومت کھیلوں کے تمام شعبوں میں بہترین کارکردگی کا مظاہرہ کرنے والے خصوصی صلاحیت کے حامل کھلاڑیوں کو تربیت فراہم کرے گی اور ایسے کھلاڑیوں کو تربیت اور کھیلوں کے مقابلوں میں شرکت کیلئے بیرون ممالک جانے کیلئے فل سپانسر کیا جائے گا۔وزیراعلیٰ نے کہاکہ مدارس کے بچے ہمارے بچے ہیں انہیں دینی تعلیم کے ساتھ ساتھ دُنیاوی تعلیم اور غیرنصابی سرگرمیوں کی سہولیات فراہم کرنا ہماری ترجیح اور اہم ذمہ داری ہے ، ہماری کوشش ہے کہ دیگر تعلیمی اداروں کے بچوں کو جو سہولیات دستیاب ہیں ، مدارس کے بچوں کو بھی وہ تمام تر سہولیات فراہم کی جائیں، ہمارے مدارس کے طلباءقومی اور بین الاقوامی سطح پر اپنا لوہا منوانے کی بھر پور صلاحیت رکھتے ہیں۔ ان خیالات کا اظہار اُنہوںنے منگل کے روز حیات آباد سپورٹس کمپلیکس میں انٹر مدارس گیمز2024 کی افتتاحی تقریب سے بحیثیت مہمان خصوصی خطاب کرتے ہوئے کیا۔ وزیراعلیٰ نے اس موقع پر حیات آباد سپورٹس کمپلیکس میں سوئمنگ پول اور 3-D سکواش کورٹ کا بھی افتتاح کیا۔

 

وزیراعلیٰ نے تقریب سے خطاب کرتے ہوئے کہاکہ صوبے میں کھیلوں کی سرگرمیوں کے فروغ کیلئے مربوط حکمت عملی کے تحت اقدامات اُٹھائے جائیں گے، کھیلوںکے مقابلے میں نمایاں کارکردگی کا مظاہرہ کرنے والے کھلاڑیوں کو بھی فل سپانسر کیا جائے گا تاکہ یہ بچے نہ صرف بین الاقوامی مقابلوں میں حصہ لیں بلکہ جیت کر ملک کا نام بھی روشن کریں۔ وزیراعلیٰ نے انٹر مدارس گیمز 2024 میں ونر ، رنراپ اور تیسرے نمبر پر آنے والی ٹیموں کیلئے 50,50 لاکھ روپے انعام کا اعلان کیا ہے ۔واضح رہے یہ انعامی رقم وزیر اعلی کی طرف سے خصوصی طور دیا جائے گا جو محکمہ کھیل کی جانب سے کھلاڑیوں کو دیئے جانے والے انعامی رقم کے علاوہ ہے ۔ وزیراعلیٰ نے اپنی تقریر میں کہاکہ ارباب نیا ز کرکٹ اسٹیڈیم کی بحالی پرکام جلد مکمل کیا جائے گا، کوشش ہے کہ اسی سال ارباب نیا ز اسٹیڈیم میں انٹر نیشنل میچز منعقد کئے جائیں ۔ صوبائی حکومت بہت جلد اضلاع ، صوبہ اور ملکی سطح کے سپورٹس ایونٹس منعقد کرے گی اور کھیلوں کی سہولیات کی فراہمی کے ساتھ ساتھ کھیلوں کی سرگرمیوں کے ذریعے قومی اور بین الاقوامی سطح پر صوبے کا مثبت تشخص اُجاگر کیا جائے گا۔ وزیراعلیٰ کا کہنا تھا کہ نوجوانوں کو منشیات کی لعنت سے محفوظ رکھنے کیلئے کھیلوں کی سرگرمیاں انتہائی ضروری ہیں، کھیلوں کی تمام سرگرمیوں میں میرٹ کو ہر لحاظ سے یقینی بنایا جائے گا ۔ علی امین گنڈا پور نے کہاکہ عمران خان کے وژن کے مطابق مدارس کے بچوں کو دُنیاوی تعلیم اور غیر نصابی سرگرمیوں کی سہولیات فراہم کی جائیں گی ،کھیلوں کی سرگرمیوں کے ذریعے صحت مند معاشرہ تشکیل دینا ہمار ا مشن ہے ۔ وزیراعلیٰ نے کہاکہ ہم سب مل کر دُنیا کو پیغام دیں گے کہ ہم پر دہشت گردی کا جو الزام ہے وہ غلط ہے ، ہم پرامن لوگ ہیں اور امن کیلئے سب کا ساتھ دینے کو تیار ہیں، جنگ کیلئے کسی کا بھی ساتھ نہیں دیں گے ۔ وزیراعلیٰ نے کہاکہ صوبے کی ترقی اور خوشحالی کیلئے ہم سب نے ایک ٹیم بن کر کام کرنا ہے ۔ وزیراعلیٰ کے مشیر برائے کھیل و اُمور نوجوانان سید فخر جہان نے بھی تقریب سے خطاب کیا۔

 

 

عالمی یوم مزدور (یکم مئی) کی مناسبت سے وزیراعلیٰ کا پیغام

پشاور ( چترال ٹائمزرپورٹ ) وزیر اعلیٰ خیبرپختونخوا سردار علی امین خان گنڈا پور نے کہا ہے کہ معاشرے میں محنت کش طبقے کی عزت ووقار اور حقوق کے تحفظ کے بغیرترقی اور خوشحالی کا خواب شرمندہ تعبیر نہیں ہو سکتا ،قومی ترقی اورخوشحالی میں محنت کش طبقے کا کردار کلیدی اہمیت رکھتا ہے۔ ہم مزدور اور محنت کش طبقے کی فلاح و بہبود اور ان کے حقوق کے تحفظ کو یقینی بناکر ہی ترقیاتی اہداف حاصل کر سکتے ہیں۔ عالمی یوم مزدور (یکم مئی) کی مناسبت سے یہاں سے جاری اپنے ایک پیغام میں وزیراعلیٰ نے کہا ہے کہ مزدوروں کا عالمی دن محنت کی عظمت اورقومی ترقی میں محنت کش طبقے کی اہمیت اور کلیدی کردار کو اُجاگر کرتا ہے۔ انہوں نے کہاکہ مزدوروں کی فلاح و بہبود اور ان کا تحفظ کسی بھی ریاست کی ترجیحات میں شامل ہو تا ہے کیونکہ محنت کش قومی ترقی میں ریڑھ کی ہڈی کی حیثیت رکھتے ہیں ۔علی امین خان گنڈا پور کا کہنا تھا کہ قومی سطح پر موجود صنعتی تربیت کے اداروں اور صنعتوں کو ایک دوسرے سے منسلک کرکے محنت کش افراد کیلئے روزگار کے باعزت اور پرکشش مواقع فراہم کئے جا سکتے ہیں۔وزیراعلیٰ نے واضح کیاکہ موجودہ صوبائی حکومت محنت کش طبقے کے کردار کو قدر کی نگاہ سے دیکھتی ہے کیونکہ محنت کش اپنا خون پسینہ ایک کرکے قومی ترقی و خوشحالی کی بنیادفراہم کرتے ہیں۔ اُنہوںنے کہاکہ آج کا دن پوری قوم خصوصی طور پر انسانی حقوق کے اداروں ، تنظیموں اور فورمز سے اس بات کا تقاضا کرتا ہے کہ مزدوروں کی فلاح کیلئے ہم اپنے عزم کا اعادہ کریں ۔ یہ طبقہ نا صرف حکومت اور ریاسی اداروں بلکہ معاشرے کے تمام طاقتور طبقات اور حلقوں کی خصوصی توجہ کا مستحق ہے۔ ہم سب کو مل کر اپنے اردگرد موجود محنت کش افراد کی بھلائی اور اُن کو درپیش مسائل کے حل کیلئے ہر ممکن کردار ادا کرنے کی ضرورت ہے ۔ یہ طبقہ جتنامضبوط اور خوشحال ہو گا ، قومی ترقی اور خوشحالی کی بنیادیں بھی اُسی قدردیرپا اور مضبوط ہوں گی ۔ میں یقین دلاتا ہوں کہ خیبرپختونخوا کی موجودہ حکومت عمران خان کے وژن کے مطابق صوبے میں مزدور وں کے حقوق کے تحفظ اور اُنہیں ان کا جائز مقام دینے اور اُن کو درپیش مسائل کو حل کرنے کیلئے مربوط حکمت عملی کے تحت نتیجہ خیز اقدامات اُٹھائے گی ۔


شیئر کریں:
Posted in تازہ ترین, جنرل خبریںTagged
88145