خیبر پختونخوا حکومت نے خصوصی افراد کی مالی معاونت کے لئے 37 کروڑ روپے مالیت سے فنانشل اسسٹنس پروگرام کا اجراٗ کر دیا
خیبر پختونخوا حکومت نے خصوصی افراد کی مالی معاونت کے لئے 37 کروڑ روپے مالیت سے فنانشل اسسٹنس پروگرام کا اجراٗ کر دیا
پشاور ( چترال ٹائمزرپورٹ ) خیبر پختونخوا حکومت نے خصوصی افراد کی مالی معاونت کے لئے 37 کروڑ روپے مالیت سے فنانشل اسسٹنس پروگرام کا اجرائ کر دیا ہے۔ وزیر اعلیٰ خیبر پختونخوا علی امین خان گنڈاپور نے بدھ کے روز پروگرام کا با ضابطہ اجرائکیا۔ اس سلسلے میں وزیر اعلیٰ ہاوس پشاور میں ایک تقریب کا انعقاد کیا گیا جس میں وزیراعلیٰ نے خصوصی افراد میں مالی امداد کے چیکس تقسیم کئے۔ صوبائی وزیر برائے سماجی بہبود سید قاسم علی شاہ کے علاوہ اراکین صوبائی اسمبلی، محکمہ سماجی بہبود کے اعلیٰ حکام اور خصوصی افراد نے بھی تقریب میں شرکت کی۔ فنانشل اسسٹنس پروگرام کے تحت صوبے کے 37 ہزار خصوصی افراد کو فی کس 10 ہزار روپے دیئے جا رہے ہیں۔
وزیر اعلیٰ نے تقریب سے خطاب کرتے ہوئے کہا کہ صوبے میں سرکاری کاغذات میں معذور کا لفظ لکھنے کی ممانعت ہوگی،ان افراد کے لئے تمام سرکاری کاغذات میں خصوصی افراد کا لفظ لکھا جائے۔ خصوصی افراد منفرد اور خصوصی صلاحیتوں کے مالک ہوتے ہیں، انہیں اپنی صلاحیتوں کو اجاگر کرنے کے لئے مواقع فراہم کرنے کی ضرورت ہے۔ وزیر اعلیٰ نے مزید کہا کہ خصوصی افراد سمیت معاشرے کے تمام کمزور طبقوں کی سرپرستی ریاست کی ذمہ داری ہوتی ہے۔ معاشرے کے کمزور طبقوں کے لئے فلاحی اقدامات بانی چیئرمین کے وژن کا اہم جز ہے۔ ” ہمارے دور حکومت میں خصوصی افراد سمیت کوئی بھی کمزور طبقہ حکومتی سپورٹ کے بغیر نہیں رہے گا، بے سہارا اور بے آسرا لوگوں کی ذمہ داری صوبائی حکومت لے گی۔ معاشرے کے کمزور طبقوں کی معاونت کے لئے ایک جامع حکمت عملی کے تحت کام کر رہے ہیں”۔
انہوں نے مزید کہا کہ صوبہ بھر میں خصوصی افراد، بیواوں اور یتیموں سمیت تمام مستحق لوگوں کا ڈیٹا اکٹھا کیا جا رہا ہے جبکہ صوبائی حکومت کے تمام فلاحی اقدامات کو مستقل بنیادوں پر چلانے کے لئے انہیں ریگولر بجٹ کا حصہ بنایا جا رہا ہے۔ وزیر اعلیٰ نے مزید کہا کہ فلاحی اقدامات اور کمزور طبقوں کی معاونت کے لئے مالی وسائل کی کوئی کمی نہیں ہوگی، خصوصی افراد کا الیکٹرک وہیل چئیرز کی فراہمی کا پروگرام شروع کر رہے ہیں۔پہلے مرحلے میں خصوصی سرکاری ملازمین اور اعلیٰ تعلیمی اداروں کے خصوصی طلبہ کو الیکٹرک ویل چیئرز دیں گے جبکہ دوسرے مرحلے میں سکولوں میں زیر تعلیم خصوصی طلبہ کو ویل چیئرز دی جائیں گی”۔
علی امین گنڈاپور کا کہنا تھا کہ موجودہ صوبائی حکومت نے جہیز فنڈ سے دی جانی والی رقم کو 25 ہزار روپے سے بڑھا کر 2 لاکھ کر دیا ہے جبکہ زکوٰة کی مد میں دی جانے والی رقم کو بڑھا کر دگنا کر دیا گیا ہے۔ ” ضعیف اور بیوہ خواتین کی معاونت کے لیے راشن کارڈ کا اجرائکر رہے ہیں جبکہ یتیم اور یسیر بچوں کی کفالت کے لئے بھی پروگرام شروع کر رہے ہیں۔ اس کے علاوہ بے سہارا بزرگ شہریوں کے لیے اسٹیٹ آف دی آرٹ اولڈ ہوم بنائیں گے جس میں تمام سہولیات فراہم کی جائیں گی، خواجہ سراوں کے لیے پناہ گاہ قائم کر رہے ہیں جہاں وہ عزت سے رہ سکیں۔ اس موقع پر وزیر اعلی نے محکمہ سماجی بہبود کے تحت اسپیشل ایجوکیشن انسٹیٹیوٹس کے اساتذہ کے لئے خصوصی اعزازیوں کا بھی اعلان کیا۔ تقریب سے صوبائی وزیر سماجی بہبود سید قاسم علی شاہ، سیکرٹری سماجی بہبود نذر حسین شاہ اور دیگر مقررین نے بھی خطاب کیا
وزیر اعلیٰ خیبر پختونخوا علی امین خان گنڈاپور نے تھانہ شرقی پشاور کا دورہ کیا اور تھانے میں نو قائم شدہ پولیس سہولت مرکز کا افتتاح کیا
پشاور ( چترا ل ٹائمزرپورٹ ) وزیر اعلیٰ خیبر پختونخوا علی امین خان گنڈاپور نے بدھ کے روز تھانہ شرقی پشاور کا دورہ کیا اور تھانے میں نو قائم شدہ پولیس سہولت مرکز کا افتتاح کیا۔ وزیر اعلیٰ نے پولیس سہولت مرکز کے مختلف شعبوں کا معائنہ بھی کیا جبکہ پولیس کے اعلیٰ حکام کی جانب سے وزیر اعلیٰ کو سہولت مرکز میں فراہم کی جانے والی خدمات اور سہولیات بارے بریفنگ دی گئی۔ وزیر اعلیٰ علی امین گنڈاپور کو بتایا گیا کہ پولیس سہولت مرکز کے قیام سے تمام تر ضروری پولیس سروسز کی ایک ہی چھت تلے فراہمی یقینی ہو گی۔ ان پولیس سروسز میں پولیس کلیئرنس،کیریکٹر سرٹیفیکیٹ،فارن رجسٹریشن، ملازمین کی ویریفکیشن، ڈومیسائل ویریفکیشن، گمشدگی اور چوری کی رپورٹ، کرایہ داروں کا معلوماتی فارم، ٹریفک انفارمیشن اور ڈرائیونگ لائسنس شامل ہیں۔ اسی طرح ڈرائیونگ لرنر، پولیس ویلفیئر میں ایڈمشن، ٹینڈر انفارمیشن، پولیس میں بھرتی، وکٹم سپورٹ اورلیگل ایڈوائس جیسی اہم سہولیات بھی سہولت مرکز میں میسر ہوں گی۔
پولیس سہولت مرکز مختلف خدمات اور سہولیات کی فراہمی کا ایک اینٹگریٹڈ اور آن لائن نظام ہے جس سے شہری تھانے جائے بغیر گھر بیٹھے یہ سہولیات اور خدمات آن لائن حاصل کرسکتے ہیں۔ یہ پولیس سہولت مرکز صوبے میں تیسرا مرکز ہے، اس سے پہلے نوشہرہ اور چارسدہ میں یہ مراکز قائم کئے گئے ہیں جبکہ اگلے مرحلے میں ان مراکز کو دیگر اضلاع تک توسیع دی جائے گی۔ وزیر اعلیٰ نے اس موقع پر متعلقہ حکام کو فوری طور پر صوبے کے تمام ڈویژنل ہیڈکوارٹرز میں اس طرح کے مراکز قائم کرنے کی ہدایت کی ہے اور کہا ہے کہ موجودہ صوبائی حکومت تمام شعبوں میں لوگوں کو زیادہ سے زیادہ سہولیات کی فراہمی کے لئے پر عزم ہے۔ تھانوں کے کلچر اور مجموعی ماحول کو عوام دوست بنایا جائے گا۔ تھانوں کے کلچر کو ایسا بنائیں گے کہ وہاں پر عوام کو مکمل تحفظ کا احساس ہو۔
وزیر اعلیٰ نے اپنی گفتگو میں کہا کہ عوام کے جان و مال کے تحفظ کے لئے خیبر پختونخوا پولیس کا کردار قابل ستائش ہے،صوبائی حکومت پولیس کی تمام ضروریات پوری کرنے اور اسے جدید عصری تقاضوں سے ہم آہنگ کرنے کے لئے ترجیحی بنیادوں پر وسائل فراہم کر رہی ہے۔انسپکٹر جنرل آف پولیس اختر حیات خان گنڈاپور اور سی سی پی او پشاور قاسم علی خان بھی اس موقع پر موجود تھے۔
