Chitral Times

Jul 22, 2024

ﺗﻔﺼﻴﻼﺕ

خیبرپختونخوا بارشیں، مختلف حادثات میں 32 جاں بحق، 41 افراد زخمی

Posted on
شیئر کریں:

خیبرپختونخوا بارشیں، مختلف حادثات میں 32 جاں بحق، 41 افراد زخمی

پشاور( چترال ٹائمزرپورٹ) خیبرپختونخوا میں بارشوں کے باعث مختلف حادثات میں 32 افرادجاں بحق جبکہ 41 زخمی ہوئے۔پی ڈی ایم اے نے حالیہ بارشوں کی وجہ سے جانی و مالی نقصانات کی رپورٹ جاری کر دی ہے، رپورٹ کے مطابق جاں بحق افراد میں 15 بچے، 12 مرد، 5 خواتین شامل ہیں۔زخمی ہونے والوں میں 6 خواتین، 28 مرداور7 بچے شامل ہیں، پی ڈی ایم اے کے مطابق خیبر پختونخوا میں دیواریں اور چھتیں گرنے سے 1370مکانات کو نقصان پہنچا۔خیبرپختونخوا میں 160گھر مکمل تباہ ہو گئے جبکہ 1210 گھروں کو جزوی نقصان پہنچا، یہ واقعات خیبر، اپر لوئر دیر، اپر لوئر چترال، سوات، باجوڑ اور شانگلہ میں پیش آئے۔مانسہرہ، مہمند، مالاکنڈ، کرک، ٹانک، مردان، پشاور، چارسدہ، نوشہرہ،بونیر، ہنگو، بٹگرام، بنوں، شمالی و جنوبی وزیرستان، کوہاٹ اور ڈی آئی خان اورکزئی میں بھی بارشوں سے حادثات رونما ہوئے۔

 

ملک میں نیٹ میٹرنگ کا حجم 1735 میگاواٹ تک پہنچ گیا

اسلام آباد(سی ایم لنکس)بجلی مہنگی ہونے اور سولر پینلز کی قیمتوں میں کمی کے باعث ملک میں سولر کے استعمال میں 50 فیصد اضافہ ہوگیا۔تفصیلات کے مطابق پاکستان میں صارفین تیزی سے سولر بجلی کے نظام کی طرف راغب نظر آرہے ہیں۔ صارفین کی تعداد 55ہزارسے بڑھ کر ایک لاکھ 15 ہزار سے تجاوز کرگئی، ملک میں نیٹ میٹرنگ کا حجم 1735 میگاواٹ تک پہنچ گیا۔خیال رہے کہ نیٹ میٹرنگ ایک بلنگ مکینزم ہے جس کے ذریعے بجلی کی تقسیم کار کمپنیاں صارفین کوسولر یا ونڈ پاور کے ذریعے پیدا کردہ بجلی جو وہ گرڈ میں ڈالتے ہیں کیلئے کریڈٹ دیا جاتا ہے۔واضح رہے کہ آئی ایم ایف سے معاہدے کے تحت پاکستان میں بجلی کی تمام لاگت صارفین کو منتقل کرنے سے فی یونٹ ستر روپے سے زیادہ ہوگیا ہے۔مہنگی بجلی اور سولر پینلز کی گرتی قیمتوں کے باعث زرعی،کمرشل،صنعتی اور گھریلو صارفین سولر سسٹم کی تنصیب کو بڑی سنجیدگی سے لے رہے ہیں۔بڑے سولر نظام میں 60 فیصد لاگت سولر پینلز کی شمار ہوتی ہے تاہم تین واٹ سے چھوٹے نظام میں پینلز کی لاگت بتیس فیصد ہے۔مارکیٹ ذرائع کے مطابق چین نے دنیا بھر میں سو لر پینل کی سپلائی بڑھا کر ریٹ ناقابل یقین حد تک گرا دیئے ہیں۔ ماہرین کے مطابق 4 پنکھے،ایک ٹی وی،ایک ریفریجیریٹر اور آٹھ ایل ای ڈی لائیٹس کے لئے ڈیڑھ کلو واٹ یا پندرہ سو واٹ کے سولر سسٹم کی تنصیب پر 1 لاکھ 55 ہزار روپے لاگت آئے گی جو کہ گزشتہ برس 2 لاکھ روپے تھی۔

یوٹیلیٹی اسٹورز پر گھی کی قیمت میں بڑا اضافہ

اسلام آباد(چترال ٹائمزرپورٹ) مہنگائی سے پریشان عوام کے لئے یوٹیلیٹی اسٹورز سے اشیا کی خریداری بھی مشکل ہوگئی۔تفصیلات کے مطابق ایک طرف مہنگائی میں روز افزوں اضافے نے عوام پر زندگی اجیرن کر رکھی ہے تو دوسری طرف حکومتی اقدامات نئی سے نئی مشکل کھڑی کرکے عام آدمی کے لیے جینا دوبھر کررہے ہیں۔یوٹیلیٹی اسٹورز پر سبسڈی والا گھی 58 روپے فی کلو مہنگا کردیا گیا، یوٹیلیٹی اسٹورز پر بی آئی ایس پی صارفین کیلئے گھی کی نئی فی کلو قیمت 393 روپے مقرر کردی۔ذرائع یوٹیلیٹی اسٹورز نے بتایا کہ گھی کی قیمت میں اضافے کا اطلاق فوری طور پر کیا جائے گا۔ذرائع کا کہنا ہے کہ رمضان پیکج کیتحت یوٹیلیٹی اسٹورزپر فی کلو قیمت 335روپے تھی اور فی کلو پر70روپیکی سبسڈی ہے۔


شیئر کریں:
Posted in تازہ ترین, جنرل خبریںTagged
87589