کراچی(چترال ٹائمزرپورٹ) ایوی ایشن انڈسٹری میں خواتین کی تعداد بڑھتی جارہی ہے اور ایوی ایشن کے مختلف شعبہ جات میں براہ راست اپنا کردار ادا کررہی ہیں۔ خواتین کے عالمی دن کے موقع پر ایوی ایشن انڈسٹری میں ایمریٹس خواتین کے اہم کردار کو دلچسپ انداز سے سامنے لایا ہے۔
اس ضمن میں ایئرلائن نے خصوصی ویڈیو جاری کی ہے جس میں دکھایا گیا ہے کہ فلائٹ ڈیک اور کریو سمیت تمام عملہ خواتین پر مشتمل ہے اور یہ ایمریٹس کے اسکائی کارگو کے زیر استعمال بوئنگ 777 فریٹر جہاز کو مختلف اسٹاپس پر کارگو فلائٹس کے لئے آپریٹ کررہی ہیں۔ امریکہ سے تعلق رکھنے والی کیپٹن ایلن روز اور آسٹریلیا سے فرسٹ آفیسر ہیڈی مک ڈیارمڈ نے 10 روز کے دوران فرینکفرٹ سے میکسیکو سٹی اور کیوٹو سے ایگواڈلا، ایمسٹرڈیم اور آخر میں دبئی آمد کے دوران تازہ پھلوں اور پھولوں سے لیکر ادویات تک 300 سے زائد ٹن کارگو کی نقل و حمل کی گئی اور اس دوران تقریبا 30 ہزار کلومیٹر کا فاصلہ طے کیا گیا۔ ان دونوں پائلٹس کے ہمراہ کینیڈا سے کیپٹن ہیدر والف بھی فرینکفرٹ سے میکسیکو سٹی کی پرواز آپریٹ کرنے کے لئے شامل ہوئیں۔
ایمریٹس کی 40 فیصد مجموعی افرادی قوت خواتین پر مشتمل ہے جن میں بیشتر کیبن کریو کے طور پر کام کررہی ہیں۔ ایمریٹس کی خواتین پائلٹس 30 سے زائد قومیتوں سے مشتمل ہیں جن کی عمروں کی رینج 23 سال سے 62 سال کے درمیان ہیں۔ 160 سے زائد قومیتوں سے تعلق رکھنے والی خواتین میں 1100 سے زائد اماراتی خواتین بھی شامل ہیں جو پورے ایمریٹس گروپ میں مختلف انتظامی امور بشمول فلائٹ آپریشنز، انجینئرنگ، ایئرکرافٹ دیکھ بھال و مرمت، کیٹرنگ، کارگو و ریمپ آپریشنز میں اپنی خدمات سرانجام دے رہی ہیں۔ ان کے علاوہ مسافروں کو ایئرپورٹ سروسز، سیلز اینڈ کسٹمر افیئرز اور بزنس سپورٹ کے کاموں میں کارپوریٹ سطح پر بھی خواتین اہم کردار ادا کررہی ہیں۔
ایمریٹس گروپ کے ایگزیکٹو وائس پریذیڈنٹ آف ہیومن ریسورسز عبدالعزیز نے کہا، ” ابتداء ہی سے ایمریٹس کی کامیابی میں بڑی حد تک خواتین کا ہاتھ رہا ہے جنہوں نے تمام کاروباری شعبوں میں بھرپور محنت اور صلاحیتوں کا مظاہرہ کیا۔ خواتین کے عالمی دن کے موقع پر ہم نہ صرف ایمریٹس میں انکی شاندار کارکردگی کو سراہتے ہیں بلکہ عالمی سطح پر ایویشن صنعت میں بھی انکی خدمات کے معترف ہیں۔ ہمیں خوشی اور فخر ہے کہ دنیا کو جوڑنے میں ہماری کثیر القومی خواتین اسٹاف نے اہم کردار ادا کیا اور ایوی ایشن انڈسٹری میں مثالی کردار کے طور پر اپنا کیرئیر آگے بڑھانے کے لئے خواتین و لڑکیوں کی حوصلہ افزائی کررہی ہیں۔”
ایمریٹس دوران سفر اپنے صارفین کے ساتھ بھی خواتین کا عالمی دن منا رہا ہے۔ اس سلسلے میں ایمریٹس کے ایوارڈ یافتہ انفلائٹ انٹرٹینمنٹ آئس میں موجود 120 سے زائد خواتین کی جانب سے ہدایت کردہ فلمیں بھی شامل ہیں۔ کیپٹن روز اور فرسٹ آفیسر ہیڈی مک ڈیارمیڈ کے آپریٹ کردہ فریٹر پروازوں پر 75 ٹن سے زائد تازہ پھول کیوٹو سے ایگواڈلا اور ایگواڈلا سے ایمسٹرڈیم تک پہنچائے گئے۔ ایمسٹرڈیم دنیا میں پھول تقسیم کرنے والا سب سے بڑا مرکز ہے۔
اسی طرح خواتین پر مشتمل تمام فلائٹ ڈیک کریو کی جانب سے آپریٹ کردہ فریٹر جہاز سے جان بچانے والی ادویات کی بروقت ترسیل کرکے 10 ٹن ادویات پہنچائی گئیں۔