اویر میں ٹیلی نار نیٹ ورک کی خرابی: عوام بنیادی سہولت سے محروم، روزمرہ زندگی متاثر
اویر میں ٹیلی نار نیٹ ورک کی خرابی: عوام بنیادی سہولت سے محروم، روزمرہ زندگی متاثر – محمد ارشاد اللہ
اپر چترال، لوٹ اویر کے علاقے میں ٹیلی نار نیٹ ورک کی غیر معیاری سروس عوام کے لیے شدید پریشانی کا سبب بن گئی ہے۔ نیٹ ورک کی بار بار خرابی کی وجہ سے طلبہ، کاروباری افراد، اور دیگر شہری اپنی روزمرہ ضروریات پوری کرنے سے قاصر ہیں۔
مقامی رہائشی امتیاز، جو ایک آن لائن یونیورسٹی کے طالبعلم ہیں، نے اپنی پریشانی کا اظہار کرتے ہوئے کہا، “گزشتہ دو ماہ سے نیٹ ورک کی ناقص کارکردگی کی وجہ سے میں اپنی آن لائن کلاسز میں شرکت نہیں کر پا رہا۔ ہمیں ایسے مسائل کا سامنا ہے گویا ہم آج بھی پتھر کے دور میں رہ رہے ہیں۔”
ایک اور طالبعلم کا کہنا تھا کہ وہ آن لائن امتحانات کی تیاری نہیں کر پا رہے کیونکہ انٹرنیٹ بار بار منقطع ہو جاتا ہے، جس سے ان کا قیمتی وقت ضائع ہو رہا ہے۔
علاقے کے کاروباری افراد بھی اس مسئلے سے شدید متاثر ہیں۔ ایک دکاندار نے بتایا کہ موبائل نیٹ ورک پر انحصار کرنے والے ایزی پیسہ اور دیگر ڈیجیٹل سروسز تعطل کا شکار ہیں، جس کی وجہ سے مالی لین دین میں مشکلات پیش آ رہی ہیں۔ اسی طرح، مقامی افراد اپنے عزیزوں سے رابطہ کرنے کے لیے بھی شدید پریشان ہیں۔
متاثرہ شہریوں نے ٹیلی نار انتظامیہ اور حکومتی اداروں سے فوری اقدامات کی اپیل کی ہے۔ ان کا کہنا ہے کہ نیٹ ورک کی بحالی میں تاخیر مزید مشکلات پیدا کرے گی۔ عوام نے خبردار کیا ہے کہ اگر مسئلہ جلد حل نہ کیا گیا تو وہ سڑکوں پر احتجاج کریں گے اور کمپنی کے خلاف قانونی کارروائی کا بھی مطالبہ کریں گے۔
اس حوالے سے ٹیلی نار کے ترجمان نے بتایا کہ نیٹ ورک میں خرابی کی وجہ تکنیکی مسائل اور چند علاقوں میں خراب موسم ہیں۔ کمپنی کی ٹیمیں نیٹ ورک کی بہتری کے لیے کام کر رہی ہیں، اور جلد ہی یہ مسئلہ حل کر لیا جائے گا۔ ترجمان نے عوام سے تعاون کی درخواست کرتے ہوئے یقین دہانی کرائی کہ نیٹ ورک کی سروس جلد معمول پر آجائے گی۔
عوام کا کہنا ہے کہ حکومت کو بھی اس مسئلے پر فوری توجہ دینی چاہیے اور اس بات کو یقینی بنانا چاہیے کہ دور دراز علاقوں میں جدید ٹیکنالوجی اور بہتر نیٹ ورک کی سہولیات فراہم کی جائیں تاکہ شہری باقی دنیا کے ساتھ قدم ملا سکیں۔
