2015 13
ﺗﻔﺼﻴﻼﺕ
 


مہ غیچ پوشاوا مہ دُورو الویان-------------ناصر علی تاثیر

 

کُوراری کھوٹ گیتی اسمانو گانی، بیلپھک کوری زمینو چھیر کوریکو

بُوحتی اذیلیان احی رُوپھیم راو اوشتم، مس دی استریان گانی اُاشٹوریتاے

 

پریشانیو ای منظر ھیہ کی پونگی چاکونیو دی نوروغی انجی

بیری نیسی کیوت کی احی لوڑیتم زبردست سورو تھے مہ سخت بوشیتاے

 

ای ویتھاناسو ھواز بُمبوریشو  سفو ٹوک زران کوری ھردیان روپھے

بے غرظیا  ھاش خبار متے پراے، ادراخا شایوز موژتو برق اوچھیتاے

 

اوا چور پونگی دیتی چھوی گمانی نہ کورا بیکو بیتی تھے بیھچیتم

مہ ھوش بوتین بیرُوو غون ای گوچا، غوزار تاناری مہ پھار نو کوسیتای

 

قوش قراٹاو کوری ای بیابانہ ایوال ایوالو دلاسا کوراوا

وا تو خدایو سار باور کورے کی کا دی ٹوک نو بیتی روشتی خومیتاے

 

ولاغ بیلو ھے دُوپیدُو ھارُونیا، ای ویزوانو ھوازا گیکا پراے

اسمان مہ سورو خومیتاے ریکو سوم زمین پونگو موڑا مہ نیشپوڑیتاے

 

غیچھان ماژی کیوت کی پھار لوڑیتم، تہ غیچ پوشیرو نہ مہ غیچ پوشیرُو

مہ غیچ پوشاوا مہ دُورو الویان، مہ گلستانو سوم کوس غیچ چوکیتاے

 

نانو پیٹیکو چے سیقو زانگُووو ھوالوت چت وا توقہ بلچ کوراوا

دُشمانو غیچ مو پوشار ھاش منظرو، اوا ژینگیتم مہ سار اویریتاے

 

چارا کوی نو چوکی ای ڈوکو ٹیکا، ھوستان مورے تان جُو غیچھین لوڑاوا

سور نا پھان کوری خورُوتُو بیھچے مہ دیھو پونگا توری ھون رُوپحیتاے

 

مہ شانہ ژانگ ھاتے تھانو سوم چنار، اسمانو چھویتو تے توریرو بیرموغ

ای درونو مُڑ لکا کی جم لوڑیتاو سے کان لواشان دی ھاروش ساٹھیتاے

 

مہ دُور کیوالی رے بشار گانیکو، شْوتارو مُوژا تے ڑانگان پاشینیان

غیچھار اشرُو گیتی ھونو ای شیکلا باغِ اِرَمو بیابان کوریتاے

 

ھیہ قدرتو امتحان وا اخرکیاغ کی کوم ریتاے وا ھاروش کوریتاے

چھترار جنت ھیس حقیقت کیہ مگر، تاثیرا ساری نا شکری نیسیتاے

 

 

 

  mail to us at: chitraltimes@gmail.com
| ﺻﻔﺤﻪ ﺍﻭﻝ | ﭼﺘﺮﺍﻝ ﺍﻳﮏ ﺗﻌﺎﺭﻑ | ﻣﻮﺳﻡ | ﺧﻄﻮﻁ | ﺷﻌﺮﻭﺷﺎﻋﺮﻯ | ﺗﺼﺎﻭﻳﺮ | ﺧﻮﺍﺗﻴﻦ | ﻫﻤﺎﺭﻯ ﺑﺎﺑﺖ |
Managed by: FAIZ webmaster@chitraltimes.com Powered by: Schafei